غجرية أسرت قلبي أسما السيد ١

١
غجريه اسرت قلبي
أسما السيد..
ــــــــــــــــــــــــــــــــــ
(انا الغجريه) أنا صبا..غجريه أبا عن جد..
هتسألوني يعني ايه غجريه..؟
ـ هقولكو معرفش..
اه معرفش..كل اللي اعرفه اني اتولدت لقيت نفسي بتنقل من مكان لمكان..
عارفين، احساس انك تبقي عايش منبوذ وسط الكون كله،الكل خايف منك، رحاله.. ملكش ارض ولا وطن..
مع اننا يمكن أطهر واجمل منهم..بس نقول ايه..؟
يالا..حظوظ..
اهو دا احساسي بالظبط..
أنا عمري ٢٢وفي الاثنين وعشرين سنه دول لفيت محافظات الجمهوريه كلها..
لحد مااستقرينا هنا في الجنوب..
جنوب الوادي..الصحرا والرمله والبحيرات الصافيه..
والجمال الطبيعي
ليالي الانس والسهر..
المكان دا.. استحوذ عليه زناتي زعيمنا..

ااه نسيت اقولكو دا بعد مطاردات كتير بينا وبين اهل الجنوب..
اللي بيكرهونا جدا..وخصوصا الستات..
اللي بنسمعهم بودانا بيقولو علينا..
(ابعدو عن الغجريات دول بيسرقوا الكحل من العين.).
هو يعني ذنبنا ان اللي يشوفنا بيقع في عشقنا..
لكن في الاخر..استقر بينا الحال وعقدنا هدنه معاهم..
واتعايشنا واتعايشو معانا..
بس للاسف مع الرجاله بس..
انما الستات بيبصوا لينا كاننا أعداءهم..
وخصوصا انا واختي مهره
مهره بتشتغل رقاصه بس مش رقاصه بالمعني
يعني استعراضيه..
ودا طبعا غصب عنها..لان ابويا العزازي بيجبرنا علي كده
ومخبيش عليكو انا كمان..انض*ربت كتير..

بس كنت بنتصر في النهايه عليه..وبردو مرقصش
انا ارقص لنفسي..أنا بعترف اني اشطر منها وفي الشرقي اقوي وامهر
بس مبحبش ارقص
انا بحب قرايه الفنجان..هوايه ورثتني اياها ست عجوزه من اهل الغجر
من سنين من لما كنت عندي ١١سنه من وقتها وانا بتحصلي حاجات غريبه..
وعندي قدره اني اعمل حاجات أغرب..
مديت ايدي وجهزت نفسي..
انا شعري طويل واصل لاخر ظهري
وعيوني زي غابات الزيتون..ودايما برسمها..
مااحنا غجر..زي مابيقولو لا عيب ولا حرام..
حطيت ايدي علي شفايفي بابتسامه وقعدت أختار ليها لون يخليني كدا طايره في السما..
مانا مقولتلكوش..

أني بعشق حط احمر الشفايف..ولازم اللون يخليني احس اني ملكه..
اخترت لون احمر فاقع وحطيته
بصيت لنفسي بابتسامه جميله..
مش بيقولك ان ملقتش حد يسعدك اسعد نفسك..
اهو دا اللي بعمله..
مديت ايدي وجبت خلاخيلي اللي مقدرش امشي من غيرهم..
دول بيخلوني طايره..
صوت رنه خلخالي بيحسسوني براحه نفسيه
وخصوصا وانا ماشيه حافيه..
أنا مبحبش البس حاجه في رجليا كفايه خلخالي..
ضحكت وصقفت علي ايديا..
واختي وقفه ورايا..
والله انتي مجنونه ياصبا..ماهتعقلي ابدا..
يابت مش ناقصين خناق..خلي يوم يعدي من غير خناق بين شباب الغجر بسببك..

ابتسمت وقولتلها ببراءه..
الله وانا مالي يامهره..يعني انحبس يعني.؟
ملحقناش نكمل لقيت امي بتنادي.
ـ صبا بت ياصبا..
ـ نفخت بزهق وقولت ..ايوه ياامه عاوزه ايه بس..؟
نواعم..بحده..قومي يابت ياللي تنشكي شوفي بنت الباشا عوزاكي في ايه..؟
قومت جري وانا بسألها..تقصدي سوزان؟
نواعم بلويه فم..ايوه يختي هي..يابت ابعدي عن بنت الشيخ دي..مش ناقصين مصايب..بكفايانا ابوكي وعمايله..
وقفت صبا واندارت ليها..تاني.
ليه بس ياامه..مانا بطلت اخرج.كتير.وكمان بقيت بشتغل معاكو..

نواعم بخوف عليها..ياصبا انتي جمالك فتان..انا مش عوزاك بين العمال..انا عوزاكي عالمسرح وسيبك من شعر الفنجان ده..اللي مبيأكلش عيش
وابعدي عن بنت الشيخ اخوها لو شم خبر مش هيرحمنا..
سبتها وخرجت بلا مبالاه كالعاده..ماأنا استحاله اطلع عالمسرح واستحاله أبعد عن الفنجان..
أنا عارفه انه حرام..بس في طاقه غريبه بتسحبني ا..
مش عارفه هيأخدني الموضوع دا لفين..؟
أو مين اللي بيظهر ليا دايما بهيبه في الفنجان..
كل اللي اعرفه..أنه أمان؟وأنا اعمل اي شئ بس عشان اعيش بأمان..

خرجت لقيت سوزان..اول ماشفتني جريت عليا..
صبا..الحقيني ياصبا..
نسيت اعرفكو..
سوزان..بنت شيخ قبيله النوارس..
اتعرفت عليها في ليله كاحله..ليله خدتني رجليا لبعيد..كالعاده.. وكأن شئ بيجذبني..
عشان اكون هناك في الوقت دا..
كانت بتجيلي خيالات علي هيئه واحده بتصرخ وبتنوح
وكالعاده سرقتني رجليا لحد مالقتني عند الكوخ القديم..
هناك لقيت بنت بتصرخ باقوي مافيها..معرفش القوه دي جتلي منين..
بس لقيتها بتعافر عشان تبعده عنها..وبتصرخ بقوتها..
يامهران..أنا آه بحبك..بس مش اجده..الله يخليك مش اجده..بوي وإلياس لو دريو هيجتلوني..
الله يخليك ياولد عمي..

بصيت لقيته بيكتفها بايديه وخلاص نار الشهوه عاميه عنيه
ساعتها عرفت ان الغبيه دي هتستسلم خلاص..
لمحتني بعنيها اللي وسعت علي أخرهم..وانفزعت وقالت
يامري..انفضحنا..؟
لقيته مره وحده بيندار..ويقولي انتي مين؟
صوته مخوفنيش ادي ماالشرار اللي في عينه دخل زي السهام في قلبي فارتعش..
ولكني صمدت وقولت بقوه..
اني صبا..بنت العزازي..
حسيت انه هياكلني بعينه وهو بيقول..بذهول..
انتي صبا جميله جميلات الغجر..
اللي بيحكو عنيها..بكل خطوه حكايه..
ابتسمت وبصيت لسوازن اللي واقفه تقول ياارض انشقي وابلعيني..
وانا بسال نفسي مين دي وليه ترضي بكدا..
فجأه جالي هاتف في وداني..

فغمضت عيني وسرحت بخيالي..
بعد شويه فتحت عيني بابتسامه..
وقولتلها انتي سوزان بنت النوارس..
شيخه قبيله النوارس
لطمت خديها..وفضلت تترجاني..اني مقولش لحد..
بصيت للواقف جنبها بتأمل فيه..
مانا عرفت انه ابن عمها…وبعدين طمنتهم ومن يوميها وانا وسوزان بنت الشيخ وكبير الجنوب كله صحاب..
بتجيلي سرقه..ولو اتقابلنا بنبقي زي الاغراب..
فوقت علي صوتها..
وهي بتبكي..
الحجيني ياصبا..مهران..
في ايه يا سوزان قلقتيني.
فضلت تبكي كتير وردت وقالت..مهران..؟
ـ ماله مهران ياسوزان..
ـ لطمت خدها وقالت..مهران هرب وفاتني ياصبا..
بعد…
بصيت لها بهدوء وقولت..اوعي تكوني عملتيها ياسوزان؟

هزت راسها وقالت..اه..اه ياصبا ايش أسوي؟ ياريتني سمعت كلامك..أني خلاص انتهيت وبوي مصمم يجوزني لزناتي واد عمي..
والياس خوي هيجتلني ياصبا..
افتحي فنجانك ياصبا واعرفيلي وينه مهران..
هزيت راسي بقله حيله وقلتلها..
ياما حذرتك منه..مسمعتيش الكلام..قولتلك باين علي وشه انه ملعب وبتاع كلام..
تعالي نشوف هيقول ايه الفنجان..
قعدت وفتحنا الفنجان في ركني البعيد عن الخيمه اللي ساكنين فيها..
حاولت اعرف شئ عن مهران..بس مشوفتش كل اللي بشوفه سواد وشاب طويل زي اللي بشوفه في الفنجان والاحلام..بس ملامحه مش ظاهره..
قفلت واتنهدت ومشيت سوزان..